Wednesday, July 21, 2010

थौं दिल्लाथ्व एकादशी भिंएकादशी हनाच्वंन

थौं दिल्लाथ्व एकादशी, नारान्द्य:या पुजा लिसें अपसं च्वना: भिंएकादशी हनाच्वंगु दु। दँयदँसं थौंया दिनय् हनीगु हरिशयनी एकादशीया झ्वलय् हिन्दू धर्मावलम्बीतयसं नारान्द्य:या पुजा याना: अपसं च्वनेगु चलन दु। थ्वपालय् एकादशी निन्हु क्यंगुलिं गुलिखे धर्मावलम्बीत कन्हय् जक अपसं च्वनेत्यंगु दु। नेपाल पञ्चाङ्ग निर्णायक समितिया नाय: डा माधव भट्टराईया कथं स्मार्त परम्परा नालीपिन्सं थौं व वैष्णव परम्परा नालीपिन्सं कन्हय् अपसं च्वनी। अपसं च्वनेगु दिनय् हे तुलसीमा पीगु पायछि जुइगु वयकलं उज्यालोयात कनादिल। हरिशयनी एकादशीइ वास:या गुण दुगु तुलसी मा थ:गु छेँय् पिना: नारान्द्य:या प्रतिककथं पुज्यायगु चलन दु। दच्छिया दुने वइगु नीप्यंगू एकादशीमध्ये चतुर्मास व्रत सुरु जुइगु हरिशयनी एकादशी व व्रत क्वचाइगु हरिबोधिनी एकादशीयात त:धंगु वा भिंगु एकादशीकथं हनेगु या:। थौंया हे दिनय् नारान्द्य: शेषशैय्याय् द्यंबिज्याइगुधार्मिक विश्वास यानात:गु दु सा हरिबोधिनी एकादशीखुनु वसपोल दनाबिज्याइगु विश्वास दु। डाक्टरतयसं धा:कथं तुलसीमाय् च्येयगुंगू ल्वय् लंकेगु क्षमता दु। थुकिया ह:, दं, स्वां, हा, पुसा फुक्कं हे उत्तिकं लाभदायक जू। थुकिं नये ययेकीगु व पाचनशक्ति नं अप्वयकीगु लिसें झाडाबान्ता दिकेगु ज्या याइ।

No comments:

Post a Comment

loading...

Lahana with Juju Kazi Maharjan